களப்பிரர் வரலாறு

தொண்டை நாட்டில் களப்பிரர்.

களப்பிரர் யாவர்?

களப்பிரர்.

களவர் என்னும் இப்பெயர் கன்னடத்தில் களபரு என்று மாறும். பின் வட மொழியில் களப்ரா என்று மாறுதல் பெறும்.  இது தமிழில் களப்பிரர் என உருப் பெரும்.  இவர்கள் ஒரு கூட்டத்தினர். அரசபடையினர் அல்லர். இவர்கள் மூவேந்தரை வென்றவர் ஆக பாண்டியர் பல்லவர் பட்டயங்கள் கூறுகின்றன.

தமிழகத்துக்கு வெளியே வேற்றரசர் பட்டயங்களில் இவர்கள் குறிப்பிடாமையின்  இவர்கள் தென்னிந்தியாவினரே என்பது தேற்றம்.

வேள்விக்குடி சின்னமனூர் பட்டயங்களில் 'கடுங்கோனுக்கு  முன்னும் சங்கத்தில் பாரதம் பாடப்பட்டதற்கு  பின்னும் பாண்டியநாடு களப்பிரர் ஆட்சியில் இருந்தது.  அப்பொழுது எண்ணிறந்த பேரரசர் ஆண்டு மறைந்தனர்' என்பது காணப்படுகிறது. பெரியபுராணத்தில் மூர்த்தி நாயனார் காலத்தில் மதுரையில் வடுக கருநாடக வேந்தன் பாண்டிய நாட்டை கைப்பற்றி அரசாண்டான் என்பது காணப்படுகிறது.

எனவே வேள்விக்குடி பட்டயம் குறிப்பிடும் சளி அரசனே பெரியபுராணம் கூறும் வடுக கருநாடக வேந்தனாக இருத்தல் வேண்டும். அஃதாவது அவனின் களப்பிர அரசன் ஆக இருத்தல் வேண்டும் என்பது கடைச் சங்கத்தின்  இறுதி காலம் கிபி 250 என கொள்ளினும், கடுங்கோன் களப்பிரரை விரட்டி பாண்டியர் அரசை நிலைநாட்டிய காலம் கிபி 575 என கொள்ளினும், களப்பிரர் பாண்டிய நாட்டை ஏறக்குறைய முன்னூறு ஆண்டுகள் ஆண்டு வந்தனர் என்பதை உறுதியாக உரைக்கலாம். எனவே களப்பிரர் ஏறக்குறைய கிபி 250 இல் பாண்டிய நாட்டைக் கைப்பற்றினர் எனலாம்.

1. இவர்கள் தொண்டைநாடு புகுந்த காலம் கிபி 200 முதல் 225 வரை.

2. சோழநாடு புகுந்த காலம் கிபி 225 முதல் 250 வரை. சோழ நாட்டை ஆண்ட காலம் கி.பி 225 முதல் 575 வரை.

3. பாண்டியநாடு புகுந்த காலம் (கிபி 250 முதல் 300)

4. ஏறக்குறைய கிபி 550 பிறகு வலி குன்றி பல்லவர் சிற்றரசராகவும் பாண்டியர் சிற்றரசராகவும் கிபி 10ஆம் நூற்றாண்டுவரை இருந்தனர்.

புகாரைத் தலைநகரமாகக் கொண்டு அச்சுத விக்ரந்தன்  என்னும் களப்பிர அரசன் ஆண்டு வந்தான் என்பதை புத்ததத்தர் குறிப்புகள் கொண்டு உணரலாம்.புத்ததத்தர்  தென்னாட்டிலிருந்த பௌத்தத் துறவி ஆவார்.  அவர் பாலி மொழியில் 'அபிதம்மாவதாரம்' என்னும் நூலை எழுதியுள்ளார். அவர் தமது நூலில் மேற்சொன்ன செய்தியை குறிப்பிட்டுள்ளார் அப் பெரியார் காலம் புத்த கோஷரது காலமான கி.பி 350 ஆகும்.

அச்சுத களப்பாளன் என்னும் பெயரைக் கொண்ட வேந்தன் ஒருவன் முடியுடை மூவேந்தரையும் வென்று சிறைப் படுத்தினான் என்று தமிழ் நாவலர் சரிதை கூறுகின்றது.  கி.பி பதினோராம் நூற்றாண்டினதான யாப்பருங்கலக்காரிகை யில் ஒரு பாடல் அவன் சிறப்பை கூறுகிறது அஃது,

அடு திறல் உருவ!  நிற் பரவுதும் எங்கோன் 

தொடுகழற் கொடும் பூண் பகட்டெழில் மார்பில்

 கயலொடு கலந்த சிலையடைக் கொடுவரிப்

 புயலுறழ் தடக்கை போர்வேல் அச்சுதன்

தொன்று முதிர் கடலுலகம் முழுவதுடன்  

ஒன்று திகிரி உருட்டுவோன் எனவே.

என்பது இது விளக்கத்தின் ஆர் என்னும் பண்டை பாவலர் பாடியதாகும்.

63 நாயன்மார்களுள் ஒருவராகிய கூற்றுவநாயனார் களப்பிரரே ஆவர். இவரைப்பற்றி நம்பியாண்டார் நம்பி

ஓதம் தழுவிய ஞாலமெல்லாமொரு  கோலில் வைத்தான்

 கோதை நெடுவேல் களப்பாளன் ஆகிய கூற்றுவனே

என்று கூறுதல் காண்க.

இவர் பல அரசர்களை வென்றவர் முடி புனைய விரும்பி தில்லைவாழ் அந்தணரை வேண்டினர். அவர்கள் இவர் சோழர் அன்மையின் மறுத்துவிட்டனர்.  அதனால் இவர் இறைவனை வேண்ட சிவபெருமான் தமது திருவடியை முடி சூட்டி அருளினார் என்பதை பெரியபுராணம் விளக்கமாக கூறுகிறது.

இவரும் கிபி ஆறாம் நூற்றாண்டுக்கு முற்பட்டவர் என்பதில் ஐயமில்லை. மற்றொரு நாயனாரான இடங்கழி நாயனார் என்பவரும் இம்மரபினரே. இவரும் கொடும்பாளூரை ஆண்ட குறுநில மன்னர் ஆவார்.

களப்பிரர்- பல்லவர்கள் போர்.

கிபி மூன்றாம் நூற்றாண்டின் தொடக்கத்தில் பல்லவர் தொண்டை மண்டலத்தைக் கைப்பற்ற முனைகையில்; அவர்களால் தாக்குண்ட இக் களப்பிரர் அருவா வடதலை நாட்டைவிட்டு தொண்டை மண்டலத்திற்கு நுழைந்தனர் . இவர்கள் நுழைவால் சோழர் சிற்றரசு தொண்டை மண்டலத்தில் வீழ்ச்சியுற்றது. பல்லவர் தொண்டை நாட்டையும் கைப்பற்ற முனைந்த பொழுது அவரிடம் போரிட்டுத் தோற்ற களப்பிரர் காஞ்சியை விட்டு பாலா ற்றுக்கு தெற்கே சென்று விட்டனர்.

அதனால்தான் பப்ப தேவன் காலத்தில் பாலாறு பல்லவர் நாட்டின் தென் எல்லையாக இருந்திருத்தல் வேண்டும். பிறகு சிவஸ்கந்தவர்மன் இக்களப்பிரரோடு  போரிட்டு தென்பெண்ணை ஆறு வரை பல்லவ நாட்டை விரிவாக்கி இருத்தல் வேண்டும்.

கிபி 5ஆம் நூற்றாண்டின் இறுதியில் அல்லது ஆறாம் நூற்றாண்டின் தொடக்கத்தில் இடைக்காலப் பல்லவர்களில் ஒருவரான' புத்தவர்மன்' கடல் போன்ற சோழர் (களப்பிரர்) சேனையை நடுங்க வைத்தான் என்று ஒரு பட்டயம் கூறுதலால் தொண்டை சோழ நாடுகளில் இருந்தகளப்பிரர்களுக்கும்

பல்லவர்களுக்கும் போர் நடந்த செய்தி உறுதியாகிறது.

கிபி 6ஆம் நூற்றாண்டின் கடைப் பகுதியில் பல்லவப் பேரரசனாக இருந்த சிம்மவிஷ்ணு (கிபி 575 முதல் 215 வரை )களப்பிரரை முறியடித்த பெருவீரன் என்று வேலூர்பாளையம் பட்டயம் கூறுகின்றது.

சிம்ம விஷ்ணுவின் பெயரனான முதலாம் நரசிம்மவர்மன் கிபி 630 முதல் 660 வரை இகல பிறரோடு போரிட்டான் கிபி ஏழாம் நூற்றாண்டின் கடையிலும் எட்டாம் நூற்றாண்டின் இடையிலும் சாளுக்கியர் களப்பிரரை கண்டுள்ளனர் வடக்கே பல்லவர்களும் தெற்கே பாண்டியர்களும் அடிக்கடி தாக்குதல் பெற்று வலிகுன்றிய இக் களப்பிரர் கிபி 7 ,8ஆம் நூற்றாண்டுகளில் தஞ்சைக்கு அருகிலும், கொடும்பாளூரிலும் முத்தரையர் என்னும் பெயருடன் சிற்றரசர்கள் ஆகி பல்லவருக்கும் பாண்டியருக்கும் அடங்கி வாழ்ந்து வந்தனர்.